هەواڵ

ئاكۆ وه‌ك یه‌كه‌م راهێنه‌رى كورد به‌شدارى له‌‌ڤۆلیبال چامپیۆنس لیگى ئه‌وروپادا كرد

سه‌نگه‌ر زرار- kurdsport

ئاكۆ كه‌ریمى راهێنه‌رى لاوى كورد و شارى مه‌هاباد-ى رۆژهه‌ڵاتى كوردستان له‌ئه‌ڵمانیا وه‌ك یه‌كه‌م راهێنه‌رى یارى باله‌ له‌مێژووى كوردستان و ئێران له‌گه‌ڵ یانه‌یه‌كى سلۆڤینیا-ى به‌شدارى له‌ڤۆلیبال چامپیۆنس لیگدا كرد.

ئاكۆ كەریمی لەگەڵ كاستی راهێنانی یانەی ئەی سی ئێچ ڤۆلی لیوبلیانا

پاش ئه‌وه‌ى سه‌ره‌تاى مانگى حوزه‌یرانى ئه‌مساڵ له‌شارى لیوبلیانا-ى سلۆڤینیا وه‌ك یاریده‌ده‌رى دووه‌مى راهێنه‌ر و وه‌رگێڕ په‌یوه‌ندى به‌ یانه‌ى ئه‌ى سى ئێچ ڤۆلى لیوبلیانا (ACH Volley Ljubljana)ى سلۆڤینیایی كرد، ئاكۆ كه‌ریمى كوڕى مامۆستا تاهیر كه‌ریمى یاریزانى دێرین و گه‌وره‌ راهێنه‌رى شارى مه‌هاباد، بووه‌ یه‌كه‌م راهێنه‌رى كورد له‌گه‌ڵ یانه‌ى ناوبراودا به‌شدارى له‌خولى باله‌ى یانه ‌پاڵه‌وانه‌كانى ئه‌وروپا (CEV Champions League)دا بكات.

ئاكۆ كەریمی لەگەڵ یانەی ئەی سی ئێچ ڤۆلی لیوبلیانا

یانه‌كه‌ى ئاكۆ كه‌ریمى (ئه‌ى سى ئێچ ڤۆلى لیوبلیانا ) رۆژانى 8 تا 10-12-2020 له‌شارى به‌رلین-ى ئه‌ڵمانیا و له‌هۆڵى ماكس شمیلینگ و له‌گروپى سێیه‌مى یانه‌كاندا شانبه‌شانى یانه‌كانى زینیت كازان-ى روسیا و به‌رلین رایسكلینگ/ ئه‌ڵمانیا و یاسترزیبسكى/ پۆڵه‌ندا یاریكرد و له‌م قۆناغه‌دا 3 یارى ئه‌نجامدا و 1 یارى برده‌وه‌ و 2 یارى دۆڕاند و پله‌ى سێیه‌مى گرت و وابڕیاره‌ رۆژانى 9 تا 11-2-2021 له‌قۆناغى دووه‌مى یارییه‌كاندا له‌هۆڵى سانت پرسبۆرگ كازان له‌شارى كازانى روسیا جارێكى تر رووبه‌ڕووى یانه‌كانى گروپه‌كه‌ى ببێته‌وه‌.

له‌مباره‌یه‌وه‌ ئاكۆ كه‌ریمى ته‌مه‌ن 29 ساڵ و راهێنه‌رى لاوى كورد تایبه‌ت بۆ (كورد سپۆرت) وتى: یانه‌ى ئه‌ى سى ئێچ ڤۆلى لیوبلیانا یه‌كێكه‌ له‌یانه‌ دیاره‌كانى سلۆڤینیا و ئه‌وروپا و مێژوویه‌كى گه‌وره‌ى هه‌یه‌ و جێى شانازییه‌ كه‌ وه‌ك راهێنه‌رێكى كورد و هه‌روه‌ها ئێرانیش له‌ڤۆلیبال چامپیۆنس لیگى ئه‌وروپادا به‌شدارى بكه‌م، یانه‌كه‌مان له‌كۆبوونه‌وه‌ى یه‌كه‌م له‌شارى به‌رلین ركابه‌رییه‌كى باشى كرد و پله‌ى سێیه‌مى گرت، ئومێد ده‌كه‌م له‌كۆبوونه‌وه‌ى دووه‌مدا بتوانێت باشترده‌ربكه‌وێ و به‌یه‌كه‌م یان دووه‌مى گروپه‌كه‌ بگاته‌ قۆناغى داهاتووى خوله‌كه‌.

*ئاكۆ كه‌ریمى كێیه‌؟
-ناوى ته‌واو: ئاكۆ تاهیر جه‌عفه‌ر كه‌ریمى.
-به‌ (ئاكۆ كه‌ریمى) ناسراوه‌.
-ساڵڕۆژى له‌دایكبوون: 10-7-1991.
-شوێنى له‌دایكبوون: شارى مه‌هاباد-ى رۆژهه‌ڵاتى كوردستان.
-خوێندكارى دكتۆرایه‌ له‌ئه‌ندازیارى میكانیكی/ زانكۆى لیوبلیانا (LJU)ى سلۆڤینیا.

په‌یوه‌ندی دار

Back to top button
Close