هەواڵ

ئۆساكا نائۆمی و لیڤاندۆڤسكی و بایرن مونشن باشترینه‌كانى ساڵى 2020ى (ئیپس) بوون

راپۆرتى: زاگرۆس نانەكەلی

لۆزانی سویسرا بووه‌ كەرنەڤاڵی باشترینەكانی ساڵى (2020)ى كۆمەڵی نێودەوڵەتی رۆژنامەنووسانی وەرزشی (ئیپس/ AIPS)، هەرچەندە ڤایرۆسی كۆڕۆنا تەنگی بەجیهان هه‌ڵچنیبوو، بەڵام لەڕێكەوتی 29-12-2020 یاریزانی تێنسی سەرزەوی (ئۆساكا نائۆمی) ژاپۆنی و (رۆبرت لیڤاندۆڤسكی) یاریزانی تۆپی پێی پۆڵه‌ندا و وه‌ك دوو باشترین وەرزشكاری ژن و پیاو بۆ ساڵی 2020ى (AIPS) دەست نیشانكران.
هەروەها یانەی بایرن مونشن-ی ئەڵمانی بەباشترین یانە دەست نیشانكرا بۆ ساڵی 2020.
لەدیاریكردنى باشنرینه‌كانى (كۆمەڵەی نێودەوڵەتی رۆژنامەنووسانی وەرزشی (ئیپس) 422 رۆژنامەنووسى وه‌رزشى لە 116 وڵاتی جیهان به‌شداربوون و دەنگیاندا، ده‌نگدانیش لەوڵاتی ئەفغانستان دەستی پێكرد و لەوڵاتی یەمەن كۆتایی هات.

هەنگاوەكانی AIPS بۆ باشترینەكان ساڵ لەكوڕان و كچان و یانەكان لەتێكڕای یارییە وه‌رزشییه‌كانە، بۆیە دەكرێ ئەمە بەهەنگاوی گشتگیر و پڕۆفیشناڵتر ناوزەند بكرێت، چونكە راستە یاری تۆپی پێ بەرفراوانتر و پڕبینەر و هەواداره‌، بەڵام مانای ئەوەش نییە وەرزش بەس تۆپی پێیە، بۆیە لۆژیك و دادپەروەری نییە زیاتر لە (30) یاری ئۆڵۆمپی فەرامۆش بكرێت، جگە لەیارییەكانی دەرەوەی ئۆڵۆمپی و هه‌مووى بكەی بەسووتماكی یارى تۆپی پێ.
بێگومان AIPS مامەڵەكردنی لەگەڵ ئەم خەڵاتە گشتگیرە كە هەروەكو خۆشیان باسی دەكەن، تاكە سەرچاوەی بڕواپێكراوی وەرزشوانان و میدیاكارانی وەرزشی جیهانییە بۆ دەستنیشان كردنی باشترینەكان لەسەرجەم یارییەكاندا، لەكۆتایی ساڵی 2020 باشترین تیپ و یانەكان لەتێكڕای جیهان و هەروها باشترین یاریزانی كوڕ و كچی لە تێكڕای یارییەكان دید و زوومی خستبووە سەر هەموو جیهان و تەنها كورد نەبێت!.
چونكە بەڕاستی ئێمە پیاو سالاری لەوەرزشیش دەكەین و تەنها زۆربەی زۆری سەیری (ز بێست و فرانس فوتبۆڵ) و ئەوانەی تایبەتن بەیاری تۆپی پێ كاری روماڵی بۆ دەكەین و گرنگی بێ شوماری پێدەدەین كە زۆرجاران بەچەندین جار لە قەبارەی بابەتەكە لەخۆی زیاتر گەورەی دەكەین، بۆیە گرنگە بۆ ساڵی نوێی 2021 ئێمە وەكو وڵاتان و نەتەوەكانی جیهان وەرزش بەتەندروستی و لۆژیك و هزر بكەین، نەك تەنها بیر لەتۆپی پێ و سەركەوتن و قبوڵ نەكردنی ئەنجام تووشی زیادەرۆیی و كێشە و دەمارگیریمان بكات و وەرزش و یاریگا وهۆڵەكان ناشیرین بكەین.
نامەوێت زیاتر درێژدادڕی بكەم، بەڵام ئەوانەی باسم كردن پێویست بوون و بۆ بەبیرهێنانەوە بوو، تا ئێمەش بەیانی بگەین بە نەتەوەكانی جیهان و بڵێین ئێمەش وەرزش دەكەین و هەموو وەرزشەكانمان خۆشدەوێ، بۆ خۆشەویستی وپەیامی ئاشتی و بەرزی نیشتمان و دووركەوتنەوە لەشەڕ و نەخۆشی و ناخۆشی و رەگەزپەرستی، چونكە هەموومان لەكۆتاییدا مرۆڤین.
لێرەوە AIPS ناوی هەموو ئەو یانە و یاریزانانه‌ لەكوڕان و كچانی ئاشكراكرد لەڕێوڕەسمێكی شایستە و منیش بەوەرگێڕانى لەهەردوو زمانی ئینگلیزی و عەرەبی كردم بەڕاپۆرتێك بۆسەر زمانی كوردی، تا شەقامی وەرزشی و میدیاكارانی وەرزشی و خوێنەرانی بەڕێز سوودێكی لێ وەربگرن.

دە باشترین وەرزشكاری پیاو
1-رۆبرت لیڤاندۆفسكی/ تۆپی پێ (620) دەنگ كە دەكاتە (16،32%).
2-لویس هامیڵتۆن/ فۆرمۆلا وەن (546) دەنگ كەدەكاتە (14،38%).
3-رافائێل نادال/ تێنسى سه‌رزه‌وى (378) دەنگ كەدەكاتە (9،95%).
4-جیمس لیبڕۆن/ باسكە (361) دەنگ كەدەكاتە (9،51%).
5-دۆبلانتیس ئەڕماند/ گۆڕەپان ومەیدان-خوهه‌ڵدان به‌زانه‌ (347) دەنگ كە دەكاتە (9،14%).
6-كریستیانۆ رۆناڵدۆ/ تۆپی پێ (300) دەنگ كەدەكاتە (7،9%).
7-نۆڤاك دیۆكۆڤیچ/ تێنسى سه‌رزه‌وى (280) دەنگ كەدەكاتە (7،37%).
8-چیپتیگی جۆشوا/ گۆڕەپان ومەیدان (181) دەنگ كەدەكاتە (4،77%).
9-پۆگاكار تادیچ/ پایسكلسواری (179) دەنگ كە دەكاتە (4،71%).
10-تیم دۆمینیك/ تێنسى سه‌رزه‌وى (104) دەنگ كەدەكاتە (2،74%).

دە باشترین خانمه‌ وەرزشكار
1-ئۆساكا نەئومی/ تێنسى سه‌رزه‌وى (526) دەنگ كە دەكاتە (13،85%).
2-رۆجای یۆلیمار/ گۆڕەپان ومەیدان (331) دەنگ كە دەكاتە (8،72%).
3-ویلیامز سیرینا/ تێنسى سه‌رزه‌وى (327) دەنگ كە دەكاتە (8،61%).
4-سویەتیك لگا/ تێنسى سه‌رزه‌وى (310) دەنگ كە دەكاتە (8،16%).
5-بریگنۆنی فیدریكا/ خلیسكانی ئەلپی (345) دەنگ كە دەكاتە (6،45%).
6-میدیما ڤیڤیانی/ تۆپی پێ (211) دەنگ كەدەكاتە (5،56%).
7-گیدی لیتیسینبیت/ گۆڕەپان ومەیدان (200) دەنگ كە دەكاتە (5،27%).
8-جێپچێرچێ پیرێس/ گۆڕەپان و مەیدان (186) دەنگ كەدەكاتە (4،9%).
9-حەسەن سیفان/ گۆڕەپان ومەیدان (182) دەنگ كەدەكاتە(4،79%).
10-شیفرین میكایلا/ حلیسكانی ئەلپی (162) دەنگ كە دەكاتە (4،27%).

باشترین ده‌ تیپ
باشترین تیپەكان لە جیهان ولەسەرجەم یارییەكاندا بەمشێوەیه‌ بوون:
1-تیپی بایرن مونشن/ تۆپی پێ (1317) دەنگ كە دەكاتە (34،68%).
2-تیپی لیڤەرپول/ تۆپی پێ (753) دەنگ كەدەكاتە (19،83%).
3-تیپى لۆس ئەنجلۆس لیكەرز/ باسكە (658) دەنگ كە دەكاتە(17،32%).
4-تیپی مرسیدس (ئەی..ئێم…جی) بترۆناس فۆرمۆلا وه‌ن (436) دەنگ كە دەكاتە (11،48%).
5-هەڵبژاردەی ئیسپانیا بۆ تۆپی دەست (140) دەنگ كەدەكاتە (3،69%).
6-تیمی بابۆس و كریستینا ملادینۆڤیتش (123) دەنگ كەده‌كاتە (3،4%).
7-تیپی بیتالۆنی نەرویژی/ كچان (107) دەنگ كەدەكاتە (2،82%).
8-خلیسكانی نیشتمانی لەسەر چیاكانی ئەلپی سویسرا، خلیسكانی ئەلپی (84) دەنگ كە دەكاتە (2،21%).
9-تیپی بیتالۆنی نەرویژی/ پیاوان (7) دەنگ كە دەكاتە (1،84%).
10-سەوڵ و كانوى ئەڵمانی/ هەشت كه‌سى (48) دەنگ كە دەكاتە (1،26%).

جێگای ئاماژەپێكردنە كۆمەڵەی نێودەوڵەتی رۆژنامەنووسانی وەرزشی كە بە (AIPS) ناسراوە، رێكخراوێكی سەربەخۆیە لەجیهاندا، پشتگیری و داكۆكی لەمافی رۆژنامەنووسانی وەرزشی جیهان دەكات، هەروەها بەرزترین دەستەی پیشەییە كە نوێنەرایەتی دەزگاكانی میدیای وەرزشی نێودەوڵەتی دەكات و زیاتر لە (9500) ئەندامی لە تێكڕای جیهاندا هەیە، ئەم رێكخراوە لەڕێكەوتی 1 تا 3-7-1942 یەكەم كۆنگرەی خۆی لەپاریسی پایتەختی فەڕەنسا بەستووه‌، (فرانتز ریشێڵ)ی فەڕەنسی بەیەكەم سەرۆكی (ئیپس) دیاریكراوه‌ كەخۆشی خاوەن بیرۆكەكە بووه‌ لەگەڵ بەلژیكی (ڤیكتۆر بوین) هەڵبژێردراوه‌، كەكۆنكرەی یەكەم بە ئامادەبوونی (29) وڵات بوو، هەروەها بەبۆنەی بەرێوەچوونی ئۆڵۆمپیادی پاریسی 1924 بووه‌، ماوەتەوەبڵێن ئەم رێكخراوە هەموو ساڵ لەڕێكەوتی 2ى ته‌ممووز یادی رۆژنامەنووسانی وەرزشی لەجیهان دەكاتەوە، چونكە لەنێوان رۆژانى 1 تا 3-7-19241/7 یەكەم كۆنگرە بەسترا و ئەم رۆژەیان كرد بەڕۆژی رۆژنامەنووسانی وەرزشی جیهانى.

په‌یوه‌ندی دار

Close