وتار

کۆیلەی وەرزشی

کۆیلەی وەرزشی
پرۆسەی وەرزش کردن بابەتێکی ئارەزوومەندانەی خۆ ویستەو سەرەتاکەی پاڵنەری ناوەکی هۆکارە بۆ پراکتیزەکردنی جموجۆڵە وەرزشیەکان و چالاکییە جەستەییەکان، ئەمانە دواتر گۆڕانی بەسەردا دێت و بارودۆخەکان لەکەسێکەوە دەگۆڕێت بۆ کەسێکی تر و دەگاتە ئەوەی کۆمەڵێك بۆ وەرزشی پیشەگەری و کێبڕکێ دەڕۆن و لەوێ خۆیان دەبیننەوە.
لەوەرزشی کێبڕکێداو لەسەر ئاستی یانەکان لەهەرێمی کوردستان، هەر تاقم و گروپ و دەستەیەك لەژێر ناوی تیپ و یانەدا کۆدەبنەوەو لەناو خولە ناوخۆییەکانی ئەم هەرێمەو عێراقدا کێبڕکێ دەکەن.
لێرە تیپێك لەوەی تر جیاوازترە، یانەیەک بۆ یانەیەك و شارێك بۆ شارێك و دەڤەرێك بۆ ئەوەی تر لەڕووی بیرکردنەوەو تێگەیشتنیان بۆ وەرزش جیاوازترو دوورترن لە یەکتری، هەندێك جار پرۆسەی خۆ بەپاڵەوان کردن و بچوککردنەوەی هاوڕێ و هاو پیشەکانی دیکە دەبینین و چەندین جار دووبارە دەبێتەوە، هاوکات پیرۆزکردن و ماستاوکردن و خۆ بچوککردنەوە بۆ بەرپرسە وەرزشییەکان، کەسێك یان چەند کەسێك دەبنە هۆکاری تێوەگلانی تیپ و یانەو ناوچەو شارێك لەو پرۆسە قێزەونەی کەپێی دەڵێن (خۆ بچوککردنەوەو پیرۆزکردنی کەسە بەقەبارە گەورە ناوەخن بۆشەکان).
سەرۆك یانەی وەرزشیی وا هەیە بۆ دەست کەوتێکی مانگانە هەموو مێژوی وەرزشیی خۆی ناشرین دەکات و بە خواستی کەسی پارە بەدەست دەجوڵێتەوە، ڕۆژنامەنوس هەیە بۆ سودێکی ماددی کەم قەڵەمەکەی وەك ژەهری مار دەڕژێنێتە ناو دنیای وەرزشەوە، ڕاهێنەر هەیە بەخۆشیەوە ناوەستێ بگرە کۆمەڵە نەوەیەکی داهاتوش دەخاتە بەردەم ئابڕوچونێکی مێژوییەوە، بەرپرسی وەرزشی وا هەیە لەبەر پۆستەکەی چاو لەهەموو ناحەقییەك دەنوقێنێت و خۆشی دەخاتە ناو کۆمەڵێك بڕیاری نادادپەروەرییەوە، ناوبژیوان و سەرپەرشتیاری وا هەیە بێ ویژدانانە ڕەنجی ساڵی تیپێك ئەفەوتێنن و هیچ سزایەکیش نایان گرێتەوە.
ئەمانەو چەندان رەفتاری ناوەرزشی دیکە لەناو یاریزان و راهێنەرو ناوبژیوان و سەرپەرشتیارو ئیداری و سەرۆک یانەو ڕاگەیاندنکارو بەرپرسی وەرزشی لەدەستەواژەی (کۆیلەی وەرزشی) جێی دەبێتەوەو ڕۆژانە بەبەرچاوماندا دێن و دەچن و هەر ئەوانیشن لەپێشەوەی ئەم بارودۆخە خراپەی وەرزشەکەی هەرێمی کوردستاندان و لەخێرو بێرەکەی دەخۆن.

نوسەر_ کاروان شێخ زیرەك

پشکنین
Close